1Cor 15 | PltULB | STEP | Ankehitriny mampahatsiahy anareo aho, ry rahalahy, ny amin’ny filazantsara izay nambarako taminareo, izay noraisinareo sy izay ijoroanareo.

1 Corinthians 15

1 Ankehitriny mampahatsiahy anareo aho, ry rahalahy, ny amin’ny filazantsara izay nambarako taminareo, izay noraisinareo sy izay ijoroanareo. 2 Amin’ny alalan’izany filazantsara izany no havoavonjy anareo, raha mihazona mafy amin’ny teny notoriako taminareo ianareo, raha tsy hoe ninonino foana.

3 Fa natolotro ho zava-dehibe voalohany ho anareo izay voaraiko ihany koa: fa maty ho an’ny fahotantsika Kristy araka ny Soratra Masina, 4 ary nalevina Izy, ary Izy dia natsangana tamin’ny maty tamin’ny andro fahatelo araka ny Soratra Masina.

5 Kristy dia niseho tamin’i Kefasy, ary avy eo tamin’ireo roa ambin’ny folo; 6 avy eo dia niseho indray mandeha tamin’ireo rahalahy mihoatry ny dimanjato Izy. Mbola velona ny ankamaroan’izy ireo, fa ny sasany dia nodimandry. 7 Avy eo Izy niseho tamin’i Jakoba, avy eo tamin’ireo apostoly rehetra.

8 Farany indrindra, dia niseho tamiko Izy, toy ny hoe tamin’ny zaza teraka tsy tonga volana. 9 Fa izaho no kely indrindra amin’ireo apostoly. Izaho dia tsy mendrika ny antsoina hoe apostoly satria nanenjika ny fiangonan’Andriamanitra aho.

10 Fa nohon’ny fahasoavan’Andriamanitra no naha toy izaho ahy, ary tsy foana ny fahasoavany ato amiko. Fa kosa, niasa mafy kokoa noho izy rehetra aho. Nefa tsy izaho izany, fa ny fahasoavan’Andriamanitra izay miaraka amiko. 11 Noho izany na izaho izany na izy ireo, araka ny nitorianay dia araka izany no ninoanareo.

12 Ankehitriny raha nambara fa Kristy dia natsangana tamin’ny maty, ahoana no hafahan’ny sasany aminareo milaza fa tsy misy ny fitsaganana amin’ny maty? 13 Nefa raha tsy misy ny fitsanganana amin’ny maty, dia tsy natsangana akory Kristy; 14 ary raha tsy natsangana Kristy, dia foana ny fitorianay, ary foana ihany koa ny finoanareo.

15 Koa, dia hita ho vavolombelona diso momban’ Andriamanitra izahay satria nijoro vavolombelona nanohitra an’Andriamanitra, niteny hoe natsangany Kristy rehefa tsy nanao izany Izy. 16 Raha tsy natsangana ny maty, dia na Kristy aza tsy natsangana; 17 ary raha tsy natsangana Kristy, dia foana ny finoanareo ary dia mbola ao amin’ny fahotanareo ianareo.

18 Ary izay rehetra maty ao amin’i Kristy dia efa very ihany koa. 19 Raha amin’ity fiainana ity ihany no ananantsika toky amin’ny ho avy ao amin’i Kristy, dia isika no mampahonena indrindra amin’ny olona rehetra.

20 Fa ankehitriny dia efa natsangana tamin’ny maty Kristy, ilay voaloham-bokatr’ireo izay maty. 21 Fa satria tonga tamin’ny alalan’ny olona iray ny fahafatesana, dia avy tamin’ny alalan’ny olona iray ihany koa no nihavian’ny fitsanganana amin’ny maty.

22 Fa toy ny nahafatesan’ny rehetra tao amin’i Adama, dia ho velomina ao amin’i Kristy ihany koa ny rehetra. 23 Kanefa samy ao amin’ny filaharany manokana ny tsirairay: Kristy, ilay voaloham-bokatra, ary avy eo ireo izay an’i Kristy dia ho atao velona amin’ny fiaviany.

24 Avy eo dia ho tonga ny farany, rehefa homen’i Kristy ho an’Andriamanitra Ray ny fanjakana. Izany dia rehefa hanafoana ny fitsipika rehetra sy ny fahefana rehetra ary ny hery Izy. 25 Fa tsy maintsy manjaka Izy mandra-pametrany ny fahavalony rehetra ao ambanin’ny tongony. 26 Ny fahavalo farany ho haringana dia ny fahafatesana.

27 Fa “Napetrany teo ambanin’ny tongony avokoa ny zavatra rehetra.” Fa voalaza fa: “Izy no nametraka ny zavatra rehetra,” dia mazava tsara fa tsy tafiditra ao anatin’izany ilay iray nametraka ny zavatra rehetra hanaiky ny tenany. 28 Rehefa manaiky Azy ny zavatra rehetra, dia ny Zanaka mihitsy no hanaiky ilay iray izay nampanaiky ny zavatra rehetra ho Azy. Hiseho izany mba ho rehetra ao amin’ny rehetra ny Andriamanitra Ray.

29 Na koa inona no ilaina ireo izay vita batisa ho an’ny maty? Raha tsy natsangana mihitsy ny maty, nahoana izy ireo no natao batisa ho an’izy ireo? 30 Nahoana ary, isika no am-bava loza isan’ora?

31 Miatrika fahafatesana isan’andro aho! Izany dia azo antoka tahaka ny fireharehako ny aminareo, izay azoko ao amin’i Kristy Jesosy Tompontsika. 32 Inona no tombony azoko, avy amin’ny fomba fijerin’ny olombelona, raha niady tamin’ny biby tao Efesosy aho, raha tsy natsangana ny maty? “Aoka isika hihinana sy hisotro satria ho faty isika rahampitso.”

33 Aza mety ho fitahana hoe: “Manimba ny fisainana tsara ny naman-dratsy.” 34 Mandiniha! Miainà am-pahamarinana! Aza manohy manota! Fa ny sasany aminareo dia tsy manana fahalalana an’Andriamanitra. Milaza izany ho amin’ny fahamenaranareo aho.

35 Fa ny olona iray hiteny hoe: “Ahoana no nananganana ny maty, ary amin’ny karazana vatana inona no hatongavan’izy ireo?” 36 Tsy mahalala na inona na inoana ianareo! Izay hafafinareo dia tsy hanomboka hitombo raha tsy maty izany.

37 Izay nafafinareo dia tsy ny vatana izay ho avy, fa voa fostiny. Izany dia mety ho lasa vary na zavatra hafa. 38 Fa homen’Andriamanitra azy ny vatana araka izay safidiany, ary samy amin’ny vatany avy ny voa tsirairay. 39 Tsy ny nofo rehetra no mitovy. Fa kosa, iray ny nofon’ny olombelona, dia hafa ny nofon’ ireo biby, ary nofo hafa ny an’ireo vorona, ary hafa ny an’ny hazandrano.

40 Misy ihany koa ireo vatana any an-danitra sy ireo vatan’ny eto an-tany. Fa karazana iray ihany ny voninahitry ny vatana any an-danitra ary hafa ny voninahitry ny eto an-tany. 41 Iray ny voninahitry ny masoandro, ary hafa ny voninahitry ny volana, ary voninahitra hafa ny an’ireo kintana. Fa ny kintana iray miavaka amin’ny kintana iray hafa amin’ny voninahitra.

42 Toy izany koa ny fitsanganana amin’ny maty. Izay afafy dia mety simba, ary izay atsangana dia tsy mety simba. 43 Afafy tamin’ny fahafaham-baraka izany; dia natsangana am-boninahitra. Afafy tamin’ny fahalemena izany; dia natsangana amin’ny hery. 44 Afafy amin’ny vatana voajanahary izany; dia atsangana ho vatana ara-panahy. Raha misy vatana voajanahary, dia misy vatana ara-panahy ihany koa.

45 Ary efa voasoratra ihany koa fa: “Lasa fanahy velona Adama ilay lehilahy voalohany” Ilay Adama farany dia lasa fanahy manome fiainana. 46 Fa tsy ny ara-panahy no tonga voalohany fa ny voajanahary, ary avy eo ny ara-panahy.

47 Ny olona voalohany dia avy amin’ny tany, namboarina tamin’ny vovoka. Ny olona faharoa dia avy any an-danitra. 48 Toy ilay iray namboarina tamin’ny vovoka, toy izany koa ilay olona any an-danitra, ary tahaka izany ihany koa ireo izay avy any an-danitra.. 49 Toy ny nitondrantsika ny endrik’ilay olon’ny vovoka, dia hitondra ny endrik’ilay olon’ny lanitra ihany koa isika.

50 Ary izao no lazaiko, ry rahalahy, fa ny nofo aman-drà dia tsy afaka ny handova ny fanjakan’Andriamanitra. Na izay mety simba handova izay tsy mety simba. 51 Indro! Zava-marina miafina no ho lazaiko anareo hoe: Tsy ho faty avokoa isika rehetra, fa hovaina avokoa isika rehetra.

52 Hiova isika amin’ny fotoana iray, ao anatin’ny indray mipi-maso, amin’ny trompetra farany. Haneno ny trompetra, ary ireo maty dia hatsangana ho tsy mety lo, ary dia hovaina isika. 53 Fa ity vatana mety simba ity dia tsy maintsy hitafy izay tsy mety lo, ary ity vatana mety maty ity dia tsy maintsy hitafy ny tsy fahafatesana.

54 Fa rehefa mitafy ny tsy mety simba ity vatana mety simba ity, ary rehefa mitafy ny tsy fahafatesana ity vatana mety maty ity, dia ho tonga amin’ilay teny izay voasoratra hoe, “Voatelina tamin’ny fandresena ny fahafatesana.” 55 “Ry fahafatesana, aiza ny fandresenao? Ry fahafatesana, aiza ny fanindronanao?”

56 Ny ota no fanindron’ny fahafatesana, ary ny herin’ny ota dia ny lalàna. 57 Fa isaorana Andriamanitra, izay manome antsika ny fandresena amin’ny alalan’i Jesosy Kristy Tompontsika!

Noho izany, ry rahalahy malalako, miorena tsara ary aza miozongozona. Miroboroboa mandrakariva amin’ny asan’ny Tompo, satria fantatrareo fa tsy very maina ny asanareo ao amin’ny Tompo.